Билјана Секуловска | 25 минути
Нема зошто да се повикува власта на одговорност заради тоа што не објави документи за потрошените пари за прославата на јубилејот 35 години независност на Македонија. Тоа е нивен јубилеј, нивно приватно славење, нивен личен успех. Тогаш кога ќе припаѓа на граѓаните и на државата овој Ден на независноста, дури тогаш ќе имаат сите право да бараат отчет и транспарентност за потрошените пари на граѓаните.
Ако Државна лотарија донирала од сопствените дивиденди за прославата, тоа се нивни пари, сеедно што се државна фирма, никакво значење нема. Станува збор за државна компанија тогаш кога живеат од парите на граѓаните, кои преку данокот им ја подаруваат егзистенцијата. Тогаш кога ги трошат народните пари, тие даноци, тогаш се стриктно приватни, особено дивидендите.
Вакви примери нема многу да можете да најдете во светот, се разбира, освен во затуцаните африкански држави, каде наплатата на трудот е непозната категорија, а честа на утепаните работници е огромна, да ги полнат џебовите на нивните водачи и кликата околу нив.
Оттука, Бобан Милошевски од Авалон нема ниту една причина да објаснува колку граѓаните платиле од своите даноци, за да ја слават независноста со Дејвид Гета.
Нема зошто ниту власта да се вознемирува и да излезе на прес-конференција и ставка по ставка да приложува документи за секој потрошен денар, за концерти и забави кои се нивна лична сопственост, за роденден за кој заслугата им припаѓа само ним, на никој и никого друг, никогаш и никаде.
Со кое право барате отчет, што сте замислиле вие, кои сте вие на оние кои го достигнале врвот да им здодевате, да ги клоцате, да им се качувате на глава, тогаш кога ве носат на раменици и ви го покажуваат патот, крив, прав, право во амбис, но височините ним им припаѓаат, а не вам, вие луѓе-нелуѓе.
Вие сте талог од кој не може да претнат, кој ги заплеткал и ги кочи, во победите, во прославите, во восхитот од сопствената големина. Блаже Конески знаеше како да го отплетка свилениот гајтан со кој се изврзале тие:
“Еве на врвот се искачив. Сам.
Тука не ме следи око ничие.
И што? Јас во себе пак го шепотам
Жалосниот сон на своето величие.”
Извор: 25 минути