Државната администрација денеска се приклучи на еко-акцијата на граѓанското здружение „Не биди ѓубре“ како начин за одработување на неработниот ден 2 јануари. Во главниот град се чистеше на 20-тина локации меѓу кои езерцето „Треска“ во Сарај, тврдината на Кале, на Водно, во околина на Собранието, долж целата улица „Македонија“, во реонот на МКЦ и на МТВ, касарната „Илинден“, кејот на Вардар, итн.
Дел од владините административци чистеа во општина Бутел, а меѓу нив беше и премиерот Зоран Заев.
„Се надевам дека на овој начин ќе влијаеме и на свеста на граѓаните за да се сочува хигиената на локациите по завршување на оваа акција“, истакна Заев од ОУ „Панајот Гиновски“.
До одредените локации што се наоѓаат малку подалеку од центарот на градот, особено Аквадуктот и Сарај, ЈСП има обезбедено и превоз, а за сите кои се вклучени во акцијата е обезбедена и соодветна опрема односно заштитни ракавици и вреќи. За подигнување на отпадот низ Скопје и негов транспорт се задолжени екипи од оперативата на Јавното претпријатие „Комунална хигиена“.
Акцијата на „Не биди ѓубре“ се спроведува на национално ниво, се одвива и во неколку македонски градови во кои се вклучија и вработени во локалните самоупорави и подрачните единици на Министерствата. Во Битола се собираше смет на три локации (Нова Битола кај градски пазар, кај Градската библиотека и во населбата „Карпош“ пришто, според информации од терен, се собрани околу 500 вреќи комунален отпад.
Активности за чистење на животната средина, меѓудругите, и во Куманово, во Демир Хисар, во Крива Паланка, во Берово каде во рамки на акцијата се засадени и 50-тина јавори во централното градско подрачје.