Рафаел Надал влегува во новата сезона со нов тренер. Шпанскиот тенисер договори соработка со својот прославен сонародник Карлос Моја, а во стручниот штаб остануваат неговиот чичко Тони и Франсис Роиг, пишува шпански „Спорт“.
Моја во март во 1999 година беше и лидер на АТП листата. Покрај тоа, забележа и 20 турнирски победи меѓу кои и на Ролан Гарос во 1998 година, негова единствена на гренслем настапите во кариерата што ја заврши во 2010 година. Со Шпанија има титула во Дејвис купот во 2004 година.
„Среќен сум што Моја ќе биде дел од мојот стручен штаб заедн со Тони и Франсис. Да имате човек покрај себе каков е Карлос, кој не е само мој пријател туку важна фигура во мојата кариера, е нешто посебно. Ќе биде со мене и на тренинзите и на турнирите. Ќе работи и во Академијата „Рафаел Надал“ заедно со останатите членови во стручниот штаб“, порача шпанскиот тенисер од Манакор, место на Балеарските острови.