Со преработка на култната песна на Леб и сол, „Чукни во дрво“, компанијата „Алкалоид“ започнува кампања за поддршка на дечињата кои се лекуваат на Универзитетската клиника за Детски болести во Скопје.
Песната, која прв пат беше испеана пред 32 години, овој пат ја препеаа децата од „Дајте музика“, Миха, Кики, Тео, Филип, Анастасија и Горјан. Тие денеска, во друштво на оригиналниот изведувач Влатко Стефановски, го промовираа видео записот снимен на 13 локации во главниот град.
Преку кампањата „Чукни во дрво“, со секој преглед на видео спотот на дигиталните канали на „Алкалоид“, Јутјуб, Фејсбук и Инстаграм, компанијата ќе донира по еден денар на Клиниката за детски болести. Кампањата почна денеска, а ќе трае до 20 септември.
„Тоа е песна за пролетта, надежта, среќата и за еланот во новите почетоци, кои во најновата преработка сезаокружени под мотото ‘Здравјето пред се’. ‘Чукни во дрво’ со своите безвременски стихови и со уникатната прерабортка и изведба од децата како дел од проектот Дајте музика ја враќа надежта во едноставните и добри дела, кои внесуваат среќа, задоволство и оптимизам во животот“, велат од компанијата.
„Алкалоид“ годинава одбележува 85 години од своето постоење.
Б. Божиновска