Со денот на распишување на претседателските избори, се забранува изградби со буџетски средства или јавни фондови, од јавни претпријатија и се друго со државен капитал, исплаќања плати, пензии, социјална помош или други исплати и надоместоци од буџетот или од јавните фондови што не се редовни исплати, постапки за нови вработувањеили отпуштања во државни и јавни институции.
Од Државната комисија за спречување на корупцијата потсетуваат дека сите овие активности се забранети со закон.
Не смее да се гради, да се вршат вонредни исплати, вработувања и откази
Во делот на изградбата на инфраструктурни проекти, се потенцира дека, освен ако за таа намена претходно се обезбедени средства од буџетот (програма донесена врз основа на закон во тековната година), не може да се почне изградба со средства од буџетот или од јавни фондови или со средства на јавни претпријатија и други правни лица што располагаат со државен капитал на нови објекти во инфраструктурата како: патишта, водоводи, далноводи, канализација, спортски игралишта и други објекти или објекти за општествени дејности училишта, градинки и други објекти.
Исто така, не се дозволени исплаќања на плати, пензии, социјална помош или други исплати и материјални надоместоци од буџетски средства или од средства на јавните фондови, кои се надвод од редовните, ниту да се продава државен капитал, да се потпишуваат колективни договори.
Забрането и започнување постапка за вработување нови лица или за престанок на работен однос во државни и јавни институции. Почнатите постапки треба да се стават во мирување, освен во случаи на итни и неодложни работи.
Не се дозволени свеченености за пуштања во употреба или изградба
На 20 дена пред почеток на изборна кампања, па до завршување на изборот на претседател и до завршување на изборите за избор на градоначалник, не може да се одржуваат јавни настани по повод почнување на изградба или пуштање во употреба на објекти со буџетски или средства од јавни фондови или претпријатија што располагаат со државен капитал, било да се работи за патишта, водоводи, далноводи, канализација, спортски игралишта или училишта и градинки.
Но, под забрана за одржување јавни настани не се подразбира јавна изјава на носител на јавна функција или кандидат за носител на јавна функција на митинг, интервју на медиум, дебата на медиум.
Во изборната кампања, забрането е користење на простор, опрема и возила на државните органи, освен лицата на кои се однесуваат посебните прописи за заштита на личноста. Забрането е и вршење и обид за вршење притисок и заплашување на гласачи или членови на нивните семејства или ним блиски лица.
-Државната комисија за спречување на корупцијата ќе го следи целиот изборен процес и во случаите на основи за сомневање дека се прекршува законот ќе презема мерки за утврдување на таквите сомневања, ќе ги извести надлежните органи и ќе бара преземање активности во рамките на нивното надлежно постапување. Непочитувањето на забраните утврдени во членовите 34 и 35 од Законот за спречување на корупцијата и судирот на интереси и во членот 8-а и 8-б од Изборниот законик, Државната комисија за спречување на корупцијата ќе ги смета за одговорност на одговорните лица на државните органи и други субјекти, а во случај на констатирани прекршувања и злоупотреби ќе преземе соодветни активности и мерки согласно закон, велат од Антикорупциската комисија.
Во претстојниот период на спроведување на активностите со претседателските избори, како и закажаните предвремени избори за градоначалник на општина Охрид, градоначалник на општина Ново Село и градоначалник на општина Дебар, ДКСК согласно одредбите од новиот Закон за спречување на корупцијата и судирот на интереси нема законски основ да дава мислења по доставени барања за мислења поврзани со начинот на постапување на министерствата, единиците на локалната самоуправа, фондовите, агенциите, дирекциите, јавните претпријатија, регулаторните тела, трговски друштва основани од државата и други институции основани од државата во текот на изборниот процес. Од ДКСК упатуваат на Законот за спречување на корупцијата кој треба доследно да се применува.




