Загубите на јавните претпријатија кои стопанисуваат со водоводите во земјава ќе влезат во новата цена на водата за пиење, но не се знае дали граѓаните ќе добијат и повисоки сметки за вода за пиење.
„Новата цена на водата за пиење, за наводнување, како и за одвод на отпадните води треба да обезбеди баланс меѓу финансиските трошоци и потреби на јавните претпријатија и социјалниот аспект на граѓаните“, изјави заменик министерoт за животна средина, Стево Темелковски на денешната конференција „Водата и отпадните води“ по повод Светскиот ден на водите.
Темелковски обелодени дека јавните претпријатија се во многу лоша финансиска состојба и располагаат со системи за водоснабдување кои имаат многу загуби на вода, а во некои општини дури има проблем со водоснабдувањето со вода за пиење, а граѓаните плаќаат сметки за услуга што не ја добиваат.
Во Регулаторната комисија за енергетика која со новиот закон ќе ги регулира цените на водата за пиење, за наводнување, како и пречистената отпадна вода велат дека го знаат проблемот со големите загуби и предлага јавните претпријатија сами да ги решат проблемите.
„Од досегашните податоци утврдено е дека имеме висок процент на загуби во системите и затоа претпријатијата ќе мора да ги подобрат техничките карактеристики на системот и да вложат во подобрување на инфраструктурата“, изјави претседателот на Регулаторната комисија за енергетика на РМ, Димитар Петров.
Според него, новиот начин на утврдување на цената на водата треба да придонесе за ефикасност на системите и подобрување на услугата како и достапна цена за граѓаните.
Потребни реформи на системите за водоснабдување во земјава се согласува и раководителот на Одделот за оперативни работи во Делегацијата на ЕУ Мауро Ди Вероли.
„Потребна е реформа на законската рамка која го регулира ова прашање, но и напори за подобрување на инфраструктурата за да се овозможи квалит во водоснабдувањето во општините“, изјави Ди Вероли.
На Светскиот ден на водите беше побарано поразумно однесување, затита и трошење на водата како природно богатство.