Инцидентите меѓу младите се резултат на градење атмосфера на нетрпеливост, на национализам и меѓуетничка омраза, што беше секојдневие во минатото и поттикнувано од највисоките државни функционери, но сегашната Влада се обидува да го промовира и до го рашири концептот живот за сите, заедничко живеење на сите етнички заедници, изјави министерката за образование и наука Рената Дескоска во врска со вчерашната тепачка меѓу две групи малолетници во Ченто.
Дескоска притоа укажа дека токму учењето на младите на толеранција и соживот меѓу различностите е и една од мерките во Стратегијата за образование 2018-2025, усвоена во вторникот на седница на Владата.
Појаснувајќи го концептот на наставните програми, таа вели дека ќе бидат внесувани елементи за запознавање на различностите, мултиетничката компонента ќе биде внесена и во учебниците, и во наставните планови, а за градење соживот ќе се обезбедуваат и просторни услови, односно сите ученици да учат во исти училишни згради.
– Во некои општини, на пример во Тетово и Куманово, ученици на македонски јазик учат во една зграда, а ученици кои учат на албански јазик учат во друга зграда. Тие се физички одвоени, што не е добра пракса. Правиме напори со градоначалниците да се обезбедат сите проектни документации и дозволи за градба со цел да ги срушиме прво тие физички бариери. Да се види дека кога учат заедно, во едно училиште, тоа може да биде позитивно, а не извор на тензии и конфликти, вели Дескоска.
Министерката Дескоска во интервјуто за Ноќното студио на Телма посочи дека таа дезинтеграција одела дотаму како што рече таа постоел страв кај МОИ и кај градоначаниците да ги сместат децата во иста училишна зграда. Она што Дескоска го истакнува е што паралелно со ваквата ситуација на теренот, МОН заедно со меѓународни институции спроведувало меѓуетничка интеграција на училишта од различни градови, на пример од Тетово и од Струмица.
На ова предупреди и комесарот за човекови права во Советот на Европа, Нилс Муижниекс по неколкудневната посета на Скопје, кој укажува дека македонските власти треба да спроведат политики што поттикнуваат интеграција и разбирање меѓу етничките заедници и промовираат социјална кохезија, бидејќи, како што вели расте поделеноста меѓу етничките македонски и албански деца, а сепарацијата раѓа недоверба, стереотипи и предрасуди.
-Охридскиот рамковен договор го запре конфликот, но не создаде кохезивно општество. Проeктите не можат да бидат замена за политиките, вам ви треба политика и долгорочна визија за тоа каде сакате да биде вашата земја за 10, 15 години. Севкупната атмосфера во сферата на човековите права е позитивна. Владата испраќа пораки за инклузивност, така што мислам дека сега е време да се отвори таа дебата за тоа каде ја гледате вашата земја на долг рок, изјави Муижниекс.
Како директен виновник за продлабочувањето на поделеноста меѓу етничките заедници, особено меѓу децата, тој ја посочува политиката.
Сепак, високиот комесар за човекови права, нема конкретен став за тоа дали спорниот закон за употреба на јазиците ќе придонесе за продлабочување на таа поделеност или обратно, но рече дека е чудно што уставноста на законот Венецијанската комисија ќе ја утврдува по донесувањето на законот, а не претходно, како што е вообичаената пракса.
-Искрено се сомневам дека мислењето на Венецијанската Комисија ќе ви помогне да утврдите дали овој закон го прави едното или другото. Затоа препорачувам да се консултирате со други меѓународни тела како што се Високиот комесар на ОБСЕ за национални малцинства, Рамковната конвенција за национални малцинства на Советот на Европа зошто тие имаат повеќе искуства со интеретничките односи, јазичните политики итн и тие можат да ви бидат многу покорисни“, вели Муижниекс.