Со казна затвор од шест месеци до 5 години може да се соочи сторителот на потпалувањето на влезната врата на Kултурниот центар „Иван Михаилов“ во Битола на 4 јуни.
Од ОЈО за НоваТВ пред малку изјавија:
– До овој момент, до ОЈО Битола не е поднесена кривична пријава за настанот. Надлежниот јавен обвинител е известен дека едно лице е лишено од слобода и се постапува за утврдување на фактите.
МВР бара одредување мерка притвор заради тоа што, како што нагласи Спасовски, се исполнети условите по однос на таквото барање, а министерот за внатрешни работи, Оливер Спасовски, денеска информираше дека е приведено 34 годишното лице Л.А од Битола, но тој не потврди, ниту негираше дека сторителот е пејачот Ламбе Алабакоски.
Како што претходно соопшти МВР, „лицето е приведено во полициска станица и при извршен службен разговор во целост го признало делото, а по документирање на случајот против него ќе биде поднесена кривична пријава по чл. 288 ст.1 од Кривичниот законик“.
Според Кривичниот законик, член 288, став 1 е Предизвикување општа опасност „Тој што со пожар, поплава, експлозија, отров или отровен гас, јонизирачко зрачење, моторна сила, електрична или друга енергија или со друго општоопасно дејствие или средство ќе предизвика значителна опасност за животот или телото на луѓето или за имот од големи размери, ќе се казни со затвор од шест месеци до пет години“.
Во КЗ се додава дека „Тој што делото од ставовите 1, 2 и 3 го стори од небрежност, ќе се казни со парична казна или со затвор до три години“.