Неколку десетици граѓани, активисти на Шарената револуција, како и членови на партиите СДСМ и Левица во моментов се пред полициската станица Пролет во Кисела Вода, каде се наоѓа приведениот активист Павле Богоевски – учесник во Шарената револуција, јавува репортерката на НОВА Сашка Цветковска. Засега ситуацијата е мирна, а бројот на граѓани пред станицата се зголемува.
Богоевски е приведен на Камени мост во Скопје вечерва за време на герила – акција.
Портпаролката на СВР Скопје Лиза Бендевска вели дека за апсењето, медиумите може да и се обратат утре, бидејќи како што рече, сега било доцна. Засега, сведоци на настанот, меѓу кои и активистот Замир Мехмети за НОВА велат дека Шарената Револуција се обиделе да направат мирна герила акција во која ќе спуштат платно од Камениот мост, за време на партиската прослава на ВМРО-ДПМНЕ, но полицијата ги спречила и без никакво предупредување го привела Богоевски.
„Ништо не нарушивме ниту направивме нешто и рипнаа почнаа да не маваа, имаше мал инцидент од неколку секунди во кој не удрија, и го однесоа Павле најверојатно во полициската станица „Пролет“, изјави Мехмети за НОВА.
Според Фејсбук објавата на Шарената револуција, при апсењето припадници на ЕБР примениле сила и насилство.
Вечерва на летната тераса пред Музејот на ВМРО се одржува прославата по повод 26 години од постоењето на владејачката партија ВМРО-ДПМНЕ.
На одбележувањето од роденденот на партијата, штотуку се обрати претседателот на ВМРО-ДПМНЕ, Никола Груевски, а присутни се и поранешниот шеф на УБК, Сашо Мијалков, премиерот Емил Димитриев, претседателот на Собранието, Трајко Велјановски, претседателката на Унијата на жените на партијата, Даниела Рангелова, Александар Пандов од ГДОМ, и други партиски членови и поддржувачи на партијата.