Собранието на Република Македонија има рок до полноќ да ги изгласа измените во Изборниот законик, согласно договорот постигнат меѓу партиите потписнички на Пржино. Собраниската седница која беше презакажана за 22 часот се уште не е почната.
ВМРО-ДПМНЕ вчеравечер испратила драфт верзија до СДСМ, но опозицијата имала забелешки на непрецизноста на одредбите.
Изборниот законик ќе претрпи измени кои се однесуваат на Избирачкиот список, вклучително и можноста Државната изборна комисија да ги брише оние гласачи од списокот што нема да се пријават во предвидениот рок. Според партискиот договор рок за пријавување ќе биде даден на 39.502 лица кои се сметаат за спорни.
Во измените треба да биде предвидено и ад хок телото за контрола на медиумите, кое ќе ја контролира нивната работа 100 дена пред изборите.
Новиот договор подразбира дека до 31 август треба да се исполнат неколку услови за одржување фер и кредибилни избори на крајот на годината (можен термин е 11 декември).
Измените во изборниот законик беше причина опозицијата повторно да се активира во Собранието.
Координаторот на пратеничката група на СДСМ Горан Сугарески вечерва изјави дека опозицијата ќе учествува во работата на Собранието, бидејќи сериозни обврски произлегуваат од Договорот за фер и регуларни избори што е постигнат, што треба да се реализираат и преку Парламентот.
„Денеска треба да се донесат измените на Изборниот законик. Наша цел е одржување фер и регуларни избори. Сите наши чекори во текот на целиот овој процес на политичката криза што ја предизвика власта се во таа насока“, рече Сугарсеки на вечерашната прес-конференција во Собранието.
Тој нагласи дека во Договорот се предвидени рокови и решенија за Избирачкиот список, медиумите, ингеренциите на министерот за внатрешни работи, вклучително и обезбедување непречена работа на Специјалното јавно обвинителство.