По 20-минутно продолжение, претседателот на Собранието Талат Џафери попладнево ја прекина седницата на која на дневен ред беше предлог законот за употреба на јазиците, и најави дека ќе утре во 11 часот.
Џафери даде еден час пауза и најави продолжување на 16. седница на која се наоѓа закон по итна постапка, односно треба да се разгледуваат измените на Законот за реализација на инфраструктурни проекти за изградба на патната делница Миладиновци – Штип со кој со анекс на договорот се предвидува продолжување на рокот за изградба на овој патен правец. Пролонгирањето на изградбата нема да има дополнителни финансиски импликации врз Буџетот.
Министерот за транспорт и врски Горан Сугарески во понеделникот изјави дека со Анексот на договорот што го усвои Владата се предлага рокот за изградба на автопатот Миладиновци – Штип да се продолжи до крајот септември следната година. Дополнителен рок го побарал изведувачот, бидејќи не успеал да ја заврши изградбата до 1 мај годинава
Претпладнево пратениците од опозицијата го повторија ставот дека законот за јазиците е противуставен и побараа негово повлекување со цел да биде доработен. Според нив, со имплементацијата на законот нема да се подобри соживотот во државата.
За парламентарното мнозинство законот е во согласност со Уставот на Република Македонија и со него не се воведува двојазичност на целата територија на државата. Законот за јазиците, како што посочија, обезбедува целосна граѓанска рамноправност.