Министерството за надворешни работи на Бугарија упати нота до Министерството за надворешни работи на Северна Македонија во врска со „бројните манифестации и пароли насочени против Бугарија кои се затекнати на јавниот простор на соседната земја во последните денови“, јавија бугарските медиуми повикувајќи се на Министерството за надворешни работи на Бугарија.
Во нотата, како што се вели, се изразува длабока загриженост за она што се случува, и за „распространетиот антиевропски наратив против воспоставувањето на добрососедски односи меѓу двете земји“.
„Особено е загрижувачки што злонамерните дела на јавниот простор ескалираат во време кога Софија и Скопје активно бараат начин за конструктивен дијалог и изнаоѓање трајни заеднички прифатливи решенија во интерес на европската интеграција на Северна Македонија и на регионот“, посочиле од бугарското Министерство за надворешни работи.
НоваТВ ја контактираше прес-канцеларијата на Министерството за надворешни работи на Северна Македонија од каде ни беше речено дека ќе добиеме одговор дали планираат да реагираат на нотата од Бугарија. (С.К.)