Фејзи Азири, кој е четвртообвинет во случајот „Монструм“ за транспортирање на двајцата главни обвинети во Косово сведоечеше три часа во Судот.
Азири рече дека по излегувањето од притвор се сретнал со Али Ахмети, а телефонски разговарал со Невзат Бејта, Жика Стојановски, Изет Меџити. Со нив разговарал за партиски работи и за доделување на субвенции за земјоделство.
На денот на масакрот кај Смилковското Езеро, тој рече дека бил кај познајник кој му должел пари. Обвинителите на СЈО Фетаи и Бубески забележаа дека Азири се сеќава на се што правел на денот на убиствата, но е конфузен за 26 април таа година кога пребегнале Алил Демири и Африм Исмаиловиќ – тој е обвинет дека им помогнал на првообвинетите да избегаат од Македонија.
Азири рече дека тој ден заедно со уште едно лице товареле трупци кои требале да ги превезат за Брест.
Пред Азири, исказ даде Агим Исмаиловиќ, кој рече дека неговиот брат Африм Исмаиловиќ е во Косово.
– Мојот брат е во Косово, комуницирав со него преку Вибер – рече тој.
На прашање на обвинителката Фатиме Фетаи која е точната адреса и каде точно се наоѓа неговиот брат Африм Исмаиловиќ, обвинет во оваа постапка кој се бара по потерница, Агим рече дека тој живее во Приштина, дека адресата не ја знае, но дека косовската полиција има точни податоци и многу добро знае каде живеат и неговиот брат Африм како и обвинетиот бегалец Алил Демири.
По завршување на денешното рочиште, обвинителката Фетаи рече дека од анализата на доказите кои темелно ќе бидат отворени и разгледани во судницата, ќе зависи дали СЈО ќе го преквалификува кривичното дело и дали ќе има нови обвинети. Од прашањата што ги поставуваа обвинителите на СЈО, денеска беа задоволни адвокатите и на обвинетите и на оштетените.
„Двајцата обвинети беа испрашувани темелно и во детали, што нам како одбрана ни одговора бидејќи ние сакаме да се стигне до вистината “ рече адвокатот на обвинетите Насер Рауфи.
И адвокатката на оштетените Дафина Ивановска рече дека се надева судскиот процес да заврши до крајот на годинава, бидејќи веќе се закажани нови рочишта.
„ Обвинителството поставува многу прашања кои ќе помогнат да се пополнат празнините во овој процес. Со прашањата се донесуваат заклучоци согласно кои излегува дека сегашната одбрана е дадена на поинаков начин од претходно “ рече Ивановска.
Следното рочиште е закажано за 23 мај, кога ќе бидат сослушани другите двајца обвинети.