Македонските затвори се пренатрупани и по овој критериум Македонија е на трето место во Европа. Во затворите има повеќе затвореници отколку што условите на затворот дозволуваат, заклучува последниот извештај на Советот на Европа за состојбата на затворите во Европа.
Истиот заклучок ја следи Македонија повеќе години по ред. Според извештајот во 2014 година Македонија е трета на списокот за пренатрупаност на затворската популација. Пред нас се само Унгарија и Белгија.
За 100 места во затворите во Македонија има 123 затвореници. На 1 септември 2014 година во Македонија имало 3.116 затвореници вклучително и притворот.
Освен Македонија, на листата се наоѓаат Грција, Албанија, Шпанија, Франција, Словенија, Португалија, Србија и Италија.
Според Советот на Европа средната цена на еден ден престој на еден затвореник изнесува 99 евра.
Македонија е исто така на врвот на листата за затвореници поради кражба (повеќе од 30 затвореници на 100.000 жители). Во 2014 година Грузија била на чело на листата со 55 затвореници а Македонија на осмо место со 36 затворени за кражна на 100.000 жители. Блиску до нас се наоѓаат Бугарија, Романија, Полска, Унгарија, Словачка или Азербејџан.
– Пренатрупаноста на затворите сериозно го спречува повторно интегрирање на затвореници и преку тоа, ги спречува и можностите за подобра заштита на општеството од криминалот. Тоа е исто така кршење на човековите права, изјави генералниот секретар на Советот на Европа Торбјорн Јагланд по повод објавувањето на извештајот. Тој смета дека посочените земји треба да ги дуплираат напорите за да гои решат проблемот и да почнат да применуваат мерки како алтернатива на затворите.
Според податоците на Советот на Европа, на континетот има 1.300.624 затвореници.