Советодавната комисија за интервенции во случај на вонредно пореметување на снабдувањето на пазарот со сурова нафта била формирана од страна на Министерот за економија, велат во одговор за НоваТВ од Владата.
Во неа ќе членуваат сите институции кои што имаат надлежност во делот на снабдувањето со енергенсите.
„Таа ќе треба одблизу да ги следи состојбите кои се случуваат на дневно ниво на светските пазари со енергенси и на дневно ниво да ја информира Владата која ако е потребно ќе ги носи одлуките веднаш штом се појави потреба за било каква одлука или интервенција“, рече премиерот Димитар Ковачевски во одговор на новинарско прашање.
Владата на вчерашната 23-та редовна седница донесе Одлука за формирање на Советодавна комисија за спроведување на План за интервенции во случај на вонредно пореметување на снабдувањето на пазарот со сурова нафта и/или нафтени деривати.
Оваа Комисија ќе има задача да иницира предлог за донесување на одлука за настанато вонредно пореметување во снабдувањето на пазарот со сурова нафта и нафтени деривати и прогласување на нафтена кризна состојба; да предлага мерки и одлуки за нормализација на снабдувањето на пазарот со сурова нафта и нафтени деривати; да предлага дополнителни мерки за нормализација на снабдувањето на пазарот, како и други работи согласно закон и Деловникот за работа кој треба да го усвои на првиот конститутивен состанок.
(Б.Б.)