Советот за култура при СДСМ ја оценува Годишната програма за проекти од национален интерес 2013 како најлоша во низата лоши програми што се донесени во изминатите години и не е изненаден од реакциите на многуте уметници и актери во културниот живот на земјата. Оттаму сметаат дека никогаш не бил поголем бројот на непознати и просечни уметници што добиле субвенции од Министерството и никогаш не бил поголем бројот на веќе видени, изветвени и проекти што очигледно не се од национален интерес за Македонија, а што се поддржани во објавената програма.
„Од изборот на проектите не може да се изведе издржан заклучок зошто едни проекти и манифестации добиле средства наспроти други, зошто едни списанија се финансирани со повеќе броеви, а други со помалку, зошто некои ликовни колонии или саеми добиле пари, а други не.“
Постојат неколку тенденции во Програмата што укажуваат на општи текови на „културната“ политика на оваа власт, а се апсолутно погрешни и неприфатливи“, пишува во реакцијата на Советот на култура на СДСМ.
За Советот е неприфатливо тоа што националната програма целосно се поделила на македонска и албанска, при што членовите на комисиите очигледно не се мешаат во работата едни на други.
„Неприфатливо е што националната програма за култура стана паричка за поткусурување на уметниците и културните работници што ѝ служат на оваа власт и на оние што не се согласуваат со владините политики.
Неприфатливо е што постои очигледна тенденција на естрадизација и популаризација на Програмата, која треба да поддржува проекти од врвен национален интерес, а тоа значи со врвен уметнички квалитет. Се поддржуваат проекти на естрадни ѕвезди и дела од популарната култура, кои во сите нормални земји се дел од независната пазарно ориентирана културна индустрија.
Неприфатливо тоа што Министерството за култура се јавува како директен организатор на домашни и меѓународни проекти од церемонијален карактер, кои ќе потрошат најголем дел од објавениот буџет, што е недозволива и недемократска практика за една нормална земја, каде што Министертвото треба да обезбеди непристрасна поделба на проектите, а не самото да се јавува како јадач на народните пари“, се вели во реакцијата.
Во Советот за култура на СДСМ сметаат дека ваквиот терк на Национална програма и начинот на нејзиното нетранспарентно објавување (без резимеа на проектите, без образложение на одлуките и без износ на доделените средства) е одамна надминат. Но, таквата пракса покажува дека Министерството за култура нема никаква визија, компетенции и желба да ги менува состојбите во уметноста и во културата кон подобро.
„Излегува дека сите заложби за донесување на културни политики, стратешки и акциски планови, за кои фингираа масовна поддршка, се само замајување на народот, додека нивниот некомпетентен, просечен и естраден, а алчен, партиски караван си врви“, додаваат од Советот.