Неодамнешните инциденти на Косово ја продлабочија недовербата меѓу заедниците, поради што дијалогот под покровителство на ЕУ сега е императив, изјави шефот на Мисијата на Обединетите нации на Косово, Захар Танин. На редовната седница на Советот на безбедност на ОН за Косово денеска тој потсети дека при крај на извештајниот период уследиле неколку инциденти кои, како што наведува, биле последица на недостигот на политичко разбирање и комуникација.
Танин додава дека е против еднострани акции. Тој наведе дека сè мора да оди низ дијалог, но дека неодамнешните акции на косовската полиција ја зголемиле недовербата на српското население на северот.
Седницата се одржува два дека по новата криза на северот на Косово, каде што на 13 октомври локалните Срби протестираа поради акцијата на полицијата против шверцери на стока. На тоа му претходеа зголемени тензии поради регистарските таблички на Косово.
На седницата на Советот за безбедност на ОН за Косово, Србија ја претставува министерот за надворешни работи, Никола Селаковиќ, додека Косово, претседателката на државата, Вјоса Османи.
Таа на седницата рече дека Косово е заговорник на мир. Според неа, крајната цел на дијалогот е меѓусебно признавање.
– Србија мора да сфати дека реалноста за независно Косово нема да се промени, рече таа.
Шефот на српската дипломатија, Селаковиќ, обвини дека косовските власти се одговорни за дестабилизацијата на северот на Косово.
– Играњето со оган не може да се реши така што двете страни ќе се повикаат на конструктивност и воздржаност, како што аплираа некои претставници на меѓународната заедница, рече тој.