Петар Мирчески, директорот на Службата за општи и заеднички работи на владата, денеска на прес-конференција информираше дека СОЗР во 2015 и 2016 година набавила два ЛЕД екрани за што платила близу милион евра. Двата екрани биле набавени преку иста фирма, а цената на екранот во 2016 година е дупло поскапа него на набавениот во 2015 година.
Фирмата преку која СОЗР ги набавувала е „Сенсор доо“
Според документите од Централен регистар фирмата „Сенсор доо“ е од мешовит капитал, а сопственици се Сашо Миноски и фирмата „Тензор“ од Словенија. Прокурист на фирмата е Миха Сенчар од Словенија, а управител е Миноски.
Првиот екран набавен во 2015 година било предвидено да се постави на Факултетот за драмски уметности. На овој тендер понуди доставиле вкупно четири компании. СОЗР со фирмата „Сенсор доо“ договорот го склучила за 340.000 евра.
Вториот екран бил набавен во 2016 година и требал да се постави на Палатата АСНОМ. На овој тендер пристигнале вкупно седум понуди, а договорот со „Сенсор доо“ бил склучен за речиси 615.000 евра, односно дупло повеќе од првиот екран.
СОЗР од „Сенсор доо“ во 2015 година набавила систем за видео надзор на објектот на владата и за тоа склучила договор на 53.000 евра.
Во март оваа година, СОЗР од „Сенсор доо“ набавила хардвер и софтвер за мрежен систем за контрола на пристап. За оваа набавка пристигнале две понуди, од кои пониската цена била 70.000, а највисоката 1.400.000 денари. И покрај критериумот за набавка од најниска цена, договорот бил склучен на 1.400.000 денари.
Мирчески рече дека против вработените кои учествувале во оваа набавка ќе се покренат дисциплински постапки, и рече дека очекува Јавното обвинителство да си ја заврши својата работа.
„Во државата има Јавно обвинителство кое треба да покрене постапка по допрен глас. Ние ќе доставиме и материјал до Ј.О. да постапува во рамки на законската регулатива во Република Македонија“, изјави Мирчески.