Британецот Адам Пити и Американката Кејти Ледеки го одбележаа првиот натпреварувачки ден во пливачките дисциплини на 17. Светско првенство во Будимпешта. Двајцата остварија рекорди на шампионатите со таа разлика што Ледеки го претвори во злато по кое Пити ќе плива утре.
Ледеки беше доминантна во финалната трка на 400 метри слободен стил во која ја оддува конкуренцијата. До највисокото место на пиедесталот стигна со време 3:58,34 минути за прво одличје во унгарскиот главен град, но и за нејзин континуитет во дисциплината од СП 2013 во Барселона и од СП 2015 во Казањ. Втор резултат (4:01,54 минути) исплива нејзината сонародничка Леа Смит, бронзата заврши на градите на Кинеската Бингџие Ли (4:03,25 минути).
Пити се најде во фокусот на внимание по полуфиналниот настап на 100 метри градно. Беше единствен што ја мина делницата под 58 секунди (57,75 секунди) што е ново најдобро остварување во дисциплината во историјата на Светските првенства. Финалето е на распоред утре, а во распределбата на комплетот медали ќе учествуваат и неговиот со сонародник Рос Мардок, Американците Квин Кордс и Коди Милер, Литванецот Андриус Сидлаускас, Јапонецот Јасухиро Косеки, Русинот Кирил Пригода и Зибеи Јан од Кина.