Македонија досега никогаш не била во четврт-финале на Светските ракометни првенства. Нова шанса за, конечно, да биде стане дел од најдобрите осум репрезентации на мундијалските турнири има попладнево (16 ч.) во олимписки Албервил. Норвешка, овојпат, е осминафинална бариера, селекција со која националниот тим одигра 31:31 на последното ЕП во Полска во 2016 година.
Двете селекции добро знаат од каде ќе доаѓа најголемата опасност. Норвежаните се свесни за значењето на Кире Лазаров и се надеваат дека ќе успеат да ја неутрализираат неговата левица, „црвено-жолтите“, пак, знаат за потенцијалот на Сагосен (21), големата надеж на противничкиот тим. И Лино Червар. меѓудруго, го укажа тоа на ракометарите при анализата и подготвувањето на тактика.
Македонија против Норвешка ќе мора без Дејан Манасков кој се повреди за време на дуелот со Исланд при последниот настап во Мец. Тој меч предвреме го заврши и Филип Миркуловски, но, за среќа, на стручниот штаб тој ќе биде во официјалниот записник за средбата.
Норвешкиот селектор го потенцира Кире Лазаров, го потенцира и Лино Червар на клупата, исто така, како големо оружје на Македонија. Изрази респект кон „црвено-жолтите“ за кои, како што истакна, подготвил план А и план Б. Без да открива премногу детаљи, што е разбирлливо, првиот веројатно се однесува на играта на неговата репрезентација во напад, а вториот во одбрана кога ќе треба да се справува со седум играчи.
Да се пристапи сериозно на мечот, да се влезе концентрирано во него и да се искористи и најмала прилика што ќе се укаже. Осцилациите да бидат сведени на минимум бидејќи поправен ќе нема. Ова се основните пораки на македонскиот селектор во пресрет на осминафиналниот настап.
„Мора да бидеме цврсти и борбено во сите 60 минути. Норвешка на ланското Европско првенство истакна дека создава тим што ќе има амбиции за самиот врв. Сакаме да ставиме нов печат на овој турнир“, вели Лино Червар под чие водство репрезентацијата покажа карактер во неколку меча во групата Б и со тимска игра попладнево може до највреден резултат досега.
Покрај ремито во Полска лани, Македонија има и победа над Норвешка во квалификациите за ЕП 2010 (30:29) и два пораза (30:36 во првиот бараж меч за ЕП 2010 и 27:29 на СП 2009 ).
Победникот од мечот Македонија – Норвешка во четврт-финалето ќе игра со победникот од средбата Унгарија – Данска.
СП во ракомет
Осминафинале
Норвешка – Македонија (денеска – 16 ч.)
Франција – Исланд (денеска – 18 ч.)
Бразил – Шпанија (денеска – 20,45 ч.)
Русија – Словенија (денеска – 20,45 ч.)