Македонија ремизира со Исланд (27:27) во последното коло од групната фаза на Светското првенство во Франција. Освоениот бод значи освојување на трето место во Б конкуренција што носи дуел со Норвешка во олимписката сала во Албервил (сабота, 16 ч.). Денешниот противник на „црвено-жолтите“ е четврти и оди на мегдан со Франција на Лил (стадион „Пјер Моро), а вечерва за првото место ќе решаваат Шпанија и Словенија. Извиси селекцијата на Тунис која поради послаба вкупна гол-разлика ќе игра со Полска за пласман од 17 до 20 место.
Репрезентација одново одигра две различни полувремиња. Првото бледо и опуштено што му припадна на Исланд чии ракометари користеа се што можеа, Македонија се врати во второто и успеа на крај да избегне пораз. Пресуди серијата од 6:1 во последните 15-тна минути кога од минус пет гола (18:23) стигна до егал што го сочува до крај.
Инспиратор беше голманот Кирил Колев кој со своите чести одбрани, вкупно 13 на средбата, беше еден вид на коректор на промашувањата и грешки во нападот во второто полувреме. Лазаров и Карасон беа најефикасни во двете селекции. Постигнаа по седум гола со тоа што македонскиот капитен останува и лидер на листата на стрелци на шампионатот со 44, дури 10 повеќе од Тунижанецот Банур.
Македонија – Исланд 27:27 (13:15)
„Арена во Мец“. Гледачи: 4.000. Судии: Грилјо и Ленци (Аргентина)
Македонија: Колев (13 одбрани), Трајковски, Манасков 5, Стоилов 3, К. Лазаров 7, Митков, Дрогришки 1, Талески 1, Миркуловски 1, В. Маркоски, Н. Маркоски 1, Георгиевски 6, Ф. Лазаров 1, Ојлески, Нелоски 1, Пешевски. Селектор: Лино Червар
Седмерци: 1/1. Исклучувања: 8 минути. Загубени топки: 15
Исланд: Густавсон (3 одбрани) 1, Едвардсон (6 одбрани), Кристјансон 2, Карасон 7, Халгримсон, Атласон 1, Сигурдсон 3, Гудмундсон 2, А. Гунарсон 2, Арнарсон, Елисон 6, Б. Гунарсон, Јонсон, Хелгасон, Магнусон 3, Смарасон. Селектор: Геир Свеинсон
Седмерци: 2/3. Исклучувања: 8 минути. Загубени топки: 13