Словенија го освои првиот медал на Светските ракометни првенства. Селекцијата што ја предводи Веселин Вујовиќ се закити со бронза на турнирот во Франција по драматичниот триумф над Хрватска со 31:30 (13:18) во малото финале.
„Коцкестите“ на тој начин доживеаја втор шокантен пораз во само 24 часа. По оној од Норвешка во полуфиналето, вечерва мораа да подадат рака на соседите и покрај плус 5 на полувреме и покрај седум гола позитива во 39 минута (22:15), во 40 минута (23:16), во 41 минута (24:17), во 42 минута (25:18), во 44 минута (26:19).
Но, Словенците не застанаа, не загубија верба. Наместо тоа, покажаа карактер и почнаа да ја топат негативата. Минута по минута, гол по гол направија серија од 13:5 и стигнаа до реми во 57 минута (29:29) со голот на Цингесар, а во 60 и поведоа со 31:30 преку Мацковшек што успеаја да го одржат до крај.
Маргуч, Цингесар и Безјак постигнаа по четири гола за Словенија, Хрватот Лука Циндриќ со седум погодоци беше најефикасен на средбата.
Утре попладне (17,30 ч.) во големото финале во „Берси“ во Париз ќе играат Франција и Норвешка.