Туарегот со кој што дополнителниот заменик министер Диме Спасов направи две сообрајни несреќи, вечерта го наполнил резервоарот со бензин од службената картичка на Министертво за труд и социјала, иако возилото е доделено на располагање на Агенцијата за вработување и Спасов го користел противзаконски.
Ова го соопшти министерката за труд и социјала Фросина Ременски, која што рече дека денеска не го видела на работа заменикот Спасов.
– Ниту постои ниту може да постои документ за користење, решение, полномошно или налог, изјави Ременски зборувајќи за тоа што Спасов го возел џипот на Агенцијата за вработување.
Повикувајќи го да поднесе итна оставка поради нарушениот углед на институцијата, Ременски додаде дека освен Туарегот, директорот на Агенцијата за вработување Влатко Поповски, на Спасов му дозволувал да користи и други три автомобила кои се во сопственост на Агенцијата.
– Противзаконски располагал подолго време со уште други три возила кои се дадени на користење на Агенцијата. То значи дека и директорот противправно и спротивно на Правилникот за користење на службени возила, овозможил користење на автомобили неовластени за нив, дополни таа.
Таа рече дека за ова ќе испрати пријава до Владата и надлежните органи за злоупотреба на службената положба и овластување на директорот на Агенцијата за вработување, кој спротивно од законот, извршува функција со извршен мандат.
Во исто време Ременски информираше дека се преземаат и интерни мерки во Министертсвото за возачот кој дал лажна изјава во полиција дека тој го управувал Туарегот.
Тој бил вработен како возач во Министерството, но не бил личен возач на Диме Спасов.
Службената картичка со која завчера наточил бензин во Туарегот, министерката обелодени дека Спасов и претходно ја злоупотребувал.