Клучна порака од Преспа форумот е дека со дијалог се решаваат најтешките прашања, истакна министерот за внатрешни работи Оливер Спасовски на утринското гостување на МТВ.
„Имавме панел посветен на миграција како предизвик, кој исто како тероризмот, кибер криминалот, и друго, ќе бидат долготрајни борби. Процесот, односно проблемот со миграцијата, кој имаше експанзија во 2016 година, не застанува и денес, а секако ќе продолжи понатаму. Тоа бара заеднички политики и стратегии за тоа како да пристапиме сите. Нема решение на вакви глобални предизвици ако самостојно градите политики. Тоа мора да биде на регионално и глобално ниво да се справуваме со миграцијата“, рече Спасовски, додавајќи дека токму дијалогот беше клучниот сегмент на Преспа форумот.
Тој посочи дека генерално Преспа форумот е создаден да се развие дијалог за многу прашања.
„Само преку дијалог се решаваат најтешките и најсложените прашања. Сето друго кое не претставува дијалог, можеби јакне одредени структури во државите, но на крајот немате резултат. Дијалогот секогаш дава резултат. Тоа е клучната порака на Преспа форумот“, нагласи министерот Спасовски.