30 посетители на ски центарот Попова Шапка биле спасени денеска, откако се изгубиле поради неповолните метео услови.
За спасувачката мисија преку Фејсбук информираа од Ски Центарот Попова Шапка.
„Ве известуваме дека поради појава на густа магла, заради безбедносни причини, запрени се шестоседата жичница, двоседата жичница “Церипашина” и ски-лифтот “Ге”‼️ Во текот на денот, поради појавата на магла и намалената видливост, беа изгубени 30 посетители кои подоцна со помош на лицата одговорни во рамки на Ски-центарот “Попова Шапка” беа пронајдени, додека пак тројца од посетителите кои беа повредени, беа извлечени, од страна на спасителните служби, на пристапно место каде што со помош на Итната медицинска помош, еден од нив, е пренесен во медицинска установа за понатамошно лекување“, стои во објавата на социјалната мрежа.
Претходно и од Министерството за внатрешни работи соопштија дека полициски службеници интервенирале при пронаоѓање на деветмина посетители на Попова Шапка, откако добиле дојава дека тие се изгубиле. Деветте лица на возраст од 15 до 45 години, а биле од Скопје, Куманово и од Косово.