И покрај истрагите на Специјаното јавно обвинителство, списоците со сигурни гласачи уште живеат како еден брутален метод за заплашување на граѓаните, а сторијата на А1 телевизија сведочи за понижувањето на граѓаните од страна на клиенталистичките збирштини во партиските редови на власта. Она што застрашува е дека овие списоци не само што сè уште се составуваат, туку стануваат и партиски стандард во многу штабови под различни партиски знамиња. Затоа, НОВАТВ будно ќе ги следи следните избори, доколку се случат, а за тоа ќе ги искористи сите традиционални и модерни алатки на известување, анализа и истражување. Нашиот тим се зголемува не само со новинари, туку и со информатичари со цел да обезбедиме квалитетно и ефикасно следење на изборите и, најпосле, квалитетно и одговорно новинарство во манирот на највисоките професионални и етички стандарди комбинирани со технологијата која ја носи новото време.
Во прилог погледнете ја сторијата на А1 телевизија поради која што во СЈО како сведоци минатата недела беа повикани новинарите Сашка Цветковска и Наташа Стојановска и нивните поранешни уредници Младен Чадиковки и Борјан Јовановски во рамки на проширувањето на истрагата во предметот „Титаник“ против високи функционери од власта. Списоците уште живеат, а наша одговорност е да направиме да алармираме и да креираме амбиент во којшто виновните ќе бидат изложени на јавност.