Јусеин Болт и Симоне Бајлс ги понесоа спортските Оскари на вечерашната гала свеченост во Монако. Спринтерот од Јамајка и американската гимнастичарка оставија неизбришлива трага на ланските Олимписки игри во Рио де Жанеиро што ги направи доминантни во конкуренцијата по ласкавото признание.
Болт е единствениот спортист до три медали на три Олимијади едноподруго. Во Пекинг, Лондон и во Рио се закити со злато во трките на 100 метри, на 200 метри и на 4х100 метри (штафетното од Пекинг го загуби поради позитивен допинг тест на колега во тимот) за четврта Оскар статуетка колку што имаат тенисерите Роџер Федерер и Серена Вилијамс и сурферот Кели Слејтер.
Американската тинејџерка Бајлс, пак, е првата девојка со четири златни одличја на едни Олимписки игри.
„Сè уште не можам да се препознам себеси во друштво на овие големи спортисти. Одлично се чувствувам. На крајот на оваа година или почетокот на наредната ќе почнам со подготовки за Игрите во Токио. Се надевам дека и таму ќе имам резултати како оние во Рио“, рече 19 годишната Бајлс.
Нејзиниот сонародник Мајкл Фелпс, најодликуваниот олимпиец на сите времиња, го доби признанието за кам-бек на годината. Тој во Рио освои пет злата во пливачките дисциплини, а по Игрите најави дека се повлекува од настапи.
Награди добија уште Нико Розберг, италијанската параолимпијка Беатриче Вио и десетчлениот тим на бегалци што го состави Интернационалниот олимписки комитет (ИОК). Половина го сочинуваа спортисти од Јужен Судан, по двајца имаше од Сирија и Демократска Република Конго и еден од Етиопија.