Бојан Јовановски, по претходно добиена дозвола од Кривичниот суд, е спроведен од истражниот затвор во Шутка до Јавното Обвинителство (ЈО) со цел, според најавите, да поднесе кривични пријави против функционери и бизнисмени. Такво нешто тој најави и по изрекување на деветгодишната затворска казна во случајот „Рекет“.
Неговиот адвокат Сашо Дуковски за ТВ Телма потврди дека Боки-13 претпладнево е спроведен во ЈО на средба со јавен обвинител. Тој притоа не прецизира колку лица ќе бидат опфатени со пријавите што, како што вели, ќе бидат поднесени на записник и сите сознанија ќе бидат предадени на обвинителите.
Јовановски по изрекување на казната во „Рекет“ на судијката Васка Николовска Масевска и судечкиот совет им порача дека парите за кои се товареше во предметот да ги бараат кај екс премиерот Зоран Заев и неговиот брат Вице Заев. Лидерот на СДСМ го негираше неговиот исказ.
Покрај Јовановски, во случајот „Рекет“ беше осудена и поранешната шефица на Специјалното Јавно Обвинителство, Катица Јанева на казна затвор од седум години. На товар на Јовановски беше ставено делата „примање награда за противзаконско влијание“ и „перење пари“, а пресудата за Јанева се однесуваше на делото „злоупотреба на службената положба и овластувања“. Затворските казни се однесуваат за рекет од 1,5 милиони евра што ги дал Орце Камчев за олеснување на неговата позиција во случајот „Империја“. Познатиот скопски бизнизмен беше споменат од Јовановски дека ќе биде меѓу пријавен во Обвинителството.