Иако веќе цела година, па и подолго, се најавува пристигнување во земјава на познатиот систем на плаќање преку Интернет, ПејПал, тоа и овојпат не се случи.
Во последното проширување на земјите во кои ќе работи компанијата, приклучени се Србија и Џорџија (поранешна Грузија), додека Македонија, Црна Гора и Молдавија останаа со празни раце. Ова се случува, иако според сите најави проширувањето на ПејПал требаше да биде регионално и да ги опфаќа сите земји, вклучувајќи ги и Албанија и Косово.
Уште во септември лани, министерот за информатичко оптество и администрација, Иво Ивановски, истакна дека според последната остварена комуникација со компанијата приклучувањето на зeмјава е во „завршна фаза“ и дека Македонија е ставена на „приоритетна листа како регион“. Но, иако поминаа девет месеци оттогаш, повторно извисивме како држава.
И додека во Македонија на ова прашање не му се обраќа поголемо внимание, во Црна Гора фактот што тие се прескокнати се претвори во мал скандал.
Директорот на „Пејпал“ за Централна и Источна Европа, Дамиен Перилат за подгорички „Вијести“ вели дека ширењето на системот е дел од развојната стратегија и дека преостанатите земји ќе се приклучуваат по системот „чекор по чекор.“
– Влезот на нови пазари е наша долгорочна определба. Како што е случај насекаде по светот, проширувањето на нашето делување на нови пазари подразбира прилично подготовки, внимание, но и инвестиции. Кога ќе одлучите да се занимавате со парите на други луѓе, тогаш морате да работите правилно од почеток – вели Перијат за весникот.
Тој додава и дека ова подразбира блиска соработка со локалните власти, вклучувајќи ги и регулаторите, како и разбирање на потребите на локалните потрошувачи.
– Нашето последно проширување во Србија и Џорџија е чекор понатаму. Останатите земји ќе следуваат – додава тој без да наведе конкретен датум.
ПејПал е систем кој овозможува електронско плаќање и трговија преку Интернет, а овозможува и безбедно праќање и примање пари без посредство на банки и други институции. Основан е во 1998 година, а од 2002 е во сопственост на И-Беј. ПејПал е најголем промотер на електронската тровија со оглед на фактот што во моментов има 120 милиони активни налози, а преку системот се тргува со 25 валути од цел свет.