Ректорката на Белградскиот универзитет, Иванка Поповиќ, денеска имаше разговори со групата студенти од Здружението „1 од 5 милиони“, кои ја блокираат зградата на Ректоратот од минатиот петок, најавувајќи за утре продолжување на разговорите.
– Разговорите со студентите беа конструктивни, веруваме дека сме еден чекор поблиску до договор. Утре продолжуваме и веруваме дека на најдобар начин ќе го најдеме решението важно за целата академска заедница, рече ректорката Иванка Поповиќ.
Студентите по состанокот изјавија дека блокадата на зградата на Ректоратот продолжува се додека не биде постигнат договор.
– Во консултација со професорите кои нè поддржаа, заклучивме дека е во наш интерес што побргу да го извадиме на виделина докторатот на Синиша Мали и универзитетот што поскоро да започне со решавање на овој проблем. Во таа насока се водеа и разговорите, а блокадата останува и се додека траат преговорите ќе нема влез за службените лица, изјави студентката Валентина Рековиќ.
Ректорката на БУ Иванка Поповиќ синоќа го осуди упадот на активистите на владејачката партија СНС во зградата на Ректоратот, оценувајќи дека со тоа е нарушена автономијата на Универзитетот.
Бидејќи ова беше услов за почеток на разговорите, студентите кои ја држат блокадата на Ректоратот рекоа дека се подготвени за преговори и за компромис.
Причините за блокадата, како што истакнуваат студентите се: неодговорното однесување на надлежните предводени од министерот за образование Младен Шарчевиќ кон образованието, падот на Универзитетот на списокот на Шангајската листа, нарушување на наставната година заради одржување на Универзијадата, најавата за иселување на студентите од Студентскиот град, одложување на испитите, скратување на годината, недостиг на литература, недостаток на простории за настава на некои факултети, а бараат и разрешување на министерот за финансии Синиша Мали. Тие најавија дека нема да се откажат од блокадите се додека не се исполнат овие две нивни барања.




