Генералниот секретар на Владата, Драги Рашковски, се самоназначил за владин претставник на Собранието на акционери на Телеком за хонорар од 500 евра по седница, обвини денеска Никола Србов од ВМРО ДПМНЕ.
– Тој е новиот владин претставник во Собранието на акционери на Телеком и претседател на Собранието на акционери. Тој се само предложил, а Зоран Заев и владата ја одобриле ваквата одлука – рече Никола Србов од ВМРО ДПМНЕ, на денешната прес конференција.
Србов во прилог на кажаното покажа документ според кој на 3 август Владата го овластила Рашковски да присуствува и да биде владин претставник на Собранието на акционери на Телеком, а ваквиот документ го потпишал токму Рашковски.
– Што значи Рашковски си се предлага, Рашковски си потпишува. Рашковски сам си се назначува. Класичен конфликт на интереси. На Рашковски мала му била платата од над 1.000 евра па сега ќе зема и 500 евра од Телеком – рече Србов.
Србов ги наброја и привилегиите кои според него му слeдуваат на Рашковски.
– Хонорар од по 500 евра за секое присуство на седница на Собранието на акционери, службен телефон, компјутери, користење на службено возило на негово барање – рече Србов.
Драги Рашковски реагираше на обвинувањата од Никола Србов.
– Јас сум определен од Владата да бидам претставник на капиталот кој Република Македонија го има во Телеком. Ова е назначување за наредното акционерско собрание на Телеком кое се одржува еднаш годишно. Некој треба да го пренесе ставот на Владата како да се гласа на акционерското собрание по точките на дневен ред. За оваа назначување не се плаќа надоместок од страна на Владата. Еднаш годишно има собрание, а со оглед на тоа дека Телеком е доминантно приватна компанија во сопственост на Маџар Телеком, истите тие носат одлука за тоа дали за тој ден следува надоместок. Впрочем, ВМРО ДПМНЕ подобро знае дали следува, бидејќи 11 години предлагаа претставник на акционерското собрание – вели Рашковски за обвинувањата од ВМРО ДПМНЕ.
Во соопштението од 19-тата владина седница која се одржа на 3 август, не беше објавена оваа кадровска одлука.
– Во однос на кадровските прашања Владата на Република Македонија на вчерашната седница ги разгледа и ги усвои кадровските предлози и заклучи да именува членови на управни и надзорни одбори во установи, агенции и други органи што се во надлежност на владата. Комисијата за кадровски прашања во владата, за секое лице поединечно, ја проверува содржината на поднесената документација за да се провери дали ги исполнуваат условите за именување и соодветно на фактите, Владата ќе ги објави одлуките во Службен весник на Република Македонија – пишува во соопштението од седницата на Влада, одржана на 3 август.
