Претседателот на САД, Џозеф Бајден и германската канцеларка Ангела Меркел, во Вашингтон разговараа за односите меѓу двете земји, пред се за разликите околу гасоводот „Северен поток 2“ и ставовите кон Кина.
За време на краткиот состанок со новинарите, и Бајден и Меркел се обидоа да ги намалат постојните разлики, јавија американските медиуми.
Бајден рече дека „соработката меѓу САД и Германија е силна“, а Меркел, која имаше лоши односи со неговиот претходник Доналд Трамп, рече дека е „многу среќна што ги продлабочува односите“ меѓу двете земји.
Канцеларката беше на работен појадок со потпретседателката на САД, Камала Харис, чиј кабинет објави дека имале „многу отворен разговор“.
Меркел, која дојде во проштална посета на Вашингтон, откако се повлекува од политиката по изборите во септември, изрази сочувство до семејствата на загинатите во разорните поплави што ги погодија Германија и Белгија.
И во Берлин и во Вашингтон постои одредена загриженост за насоката на развој на односите меѓу двете земји по повлекувањето на Меркел.