Иднината на регионот, чекорите кои треба да се преземат за создавање позитивна визија за таа иднина, зајакнување на соработката меѓу организациите на цивилните општества на двете земји, како и на академските институции, биле дел од темите на денешната средба на шефовите на дипломатиите на Македонија и на Грција, Никола Димитров и Никос Коѕиас, одржана на маргините на квадрилатералниот министерски состанок во Солун.
На новинарско прашање дали ќе побара објаснување од Коѕиас за налепниците кои грчките полицајци ги ставаат на македонските возила при влез во Грција, Димитров одговори дека двете земји имаат различни ставови по тоа прашање.
– Можам да го отворам и тоа прашање, меѓутоа различно приоѓаме кон него. За да се реши прашањето што не разделува, треба да најдеме прашање кое не поврзува, нагласи Димитров.
На средбата во Солун, освен Димитров и Коѕиас, учествуваат и министрите за надворешни работи на Бугарија и на Албанија.
Отварајќи ја средбата утрово, Коѕиас најави дека ќе се разговара за безбедносните прашања, јакнење на соработката во оваа сфера во контекст за новите предизвици со кои се соочува регионот, но и светот генерално, засилување на прекуграничната соработка, како и енергетиката, односно можноста за нови проекти во оваа сфера.
– Балканот е регион кој ветува многу во однос на развојот на енергетиката, во смисла на изградба на гасововоди и други проекти, поради што е потребно зајакнување на соработката меѓу земјите од регионот, а пред се на четирите, кои учествуваат денеска на квадрилатералната средба во Солун, Македонија, Грција, Бугарија и Албанија, рече Коѕиас.
На синоќешната работна вечера биле разгледани прашања поврзани со унапредување на меѓусебната соработка меѓу земјите преку министерствата за надворешни работи.
Поединечни состаноци одржуваат министрите за надворешни работи, за внатрешни работи, за енергетика и за економија.
Ова е втора средба во ваков формат, во рамки на напорите на грчката дипломатија за зајакнување на регионалната стабилност и трансграничната соработка меѓу соседните земји од јужниот дел на Балканот. Настанот ќе биде со поширок дневен ред и претставува продолжение на неодамнешните контакти на Коѕиас со неговите колеги од овие три земји за време на Генералното собрание на ОН од 18 до 22 септември во Њујорк.