Пратениците на Српската листа, кои пред денови поднесоа оставки од мандатите во Собранието на Косово, се сменети со други пратеници на оваа партија, јавува косовски Телеграф.
Ова на денешната пленарна седница на Собранието го соопшти спикерот Глаук Коњуфца.
Новите пратеници на Српската листа дадоа заклетва, а потоа ја напуштија салата.
Српска Листа на 5 ноември 2022 година најави излегување на Србите од институциите на Косово, додека на 7 ноември официјално му ги врачија пратеничките мандати на Собранието на Косово.
Нивното заминување дојде по одлуката на косовските власти да го суспендираат директорот на косовската полиција за северниот регион, Ненад Ѓуриќ, кој одби да ја спроведе одлуката на Владата на Косово за пререгистрација на автомобили со регистарски таблички издадени од Србија во РКС – Република Косово.
Откако денеска во Собранието на Косово дадоа свечена заклетва девет нови пратеници на Српска Листа, од партијата излегоа со соопштение за постапката.
Српска Листа во своето појаснување нагласуваат дека „денешната стратешка одлука директно ја спречи реализацијата на планот на Албин Курти и „соодветните“ Срби за промена на Уставот и законите кои ги гарантираат правата на српскиот народ во Косово“.
Понатаму се вели дека намерата на Курти и на поранешната пратеничка во Собранието на Косово, Рада Трајковиќ била да гласаат за уставните измени.
„Намерата на Курти и Рада Трајковиќ, како и на другите како неа, беше да гласаат за уставни измени кои ќе доведат до укинување на српските општини, отстранување на имотот од СПЦ, отстранување на српскиот јазик, право на застапување во институции и слично“, се наведува во соопштението од Српската листа, најголемата српска партија на Косово, која има поддршка од официјален Белград. Од таму додаваат дека оваа одлука на никаков начин нема да го запре процесот на напуштање на косовските институции на север, како одговор на прекршувањето на бриселскиот Договор.
Д. Тахири
Извор: Цивил медиа