Законот за амнестија од денеска стапува во сила, а од понеделник затворите ќе почнат со дистибуција на затворските досиеја на осудените лица до судовите кои им ги изрекле затворските казни.
Од Управата за извршување санкции велат дека се подготвени за доставување на сите решенија што ги ослободуваат осудените лица од издржување на казна затвор, но дека брзината на излегување на амнестираните зависи од судовите кои ги изготвуваат решенијата.
– Организирани сме до сите судови на рака да им се пренесат решенијата за да не се губи време по пошта, велат од Управата и посочуваат дека станува збор за околу 800 амнеситрани затвореници.
– Како судовите ќе изготват решенија, така тие треба да се достават до затворите, да се потпишат и да се вратат назад. Значи, брзината на излегување зависи од судот. До понеделник се ќе биде доставено до судовите во целата Република, додаваат од Управата.
Законот за амнестија беше донесен на 15 јануари. Со него, покрај целосно укинување на казната за околу 800 затвореници, се предвидува и намалување на казната за 30 отсто и на 3.097 осудени лица.
На овој начин, според Владата, која е предлагач на Законот, ќе се заштедат буџетски средства кои би се искористиле за подобрување на условите во казнено-поправните домови.
Министерот за внатрешни работи Оливер Спасовски вчера уште еднаш нагласи дека со амнестијата се опфатени затвореници осудени за полесни кривични дела, но не и оние осудени за убиство, за кривични дела против изборите и гласањето, за силување, педофилија, посредување во вршење проституција, потоа за кривични дела против државата, за злосторничко здружување, како и за кривичните дела против човечноста и меѓународното право.