Еден жител во земјава во текот на минатата година создал 456 килограми комунален отпад што е за 10,7 отсто повеќе од 2018 година, објави Државниот завод за статистика. Податоците покажуваат дека вкупното количество на собран комунален отпад во Македонија во 2019 година изнесува 632.484 тони и споредено со 2018 година е повеќе за 1,1 отсто.
Најголемо количество комунален отпад е собран во скопскиот регион – 164.971 тон или 26,1 отсто од вкупното собрано количество. Поголемиот дел (83 отсто) се собира од домаќинствата, а 17 отсто е комерцијален отпад.
Според видовите отпад, најголемо количество отпаѓа на измешан комунален отпад – 542.664 тони или 85,8 отсто, а најмало количество е гума – 778 тони или 0,1 отсто.
Статистичките податоци покажуваат дека вкупното количество на создаден комунален отпад лани во земјава изнесува 915.943 тони. Најголемото количество на собран комунален отпад (99,7 отсто) завршува на депонија.