Не сум скарана со двајцата обвинети, но не сум во добри односи со Катица Јанева, рече обвинителката Лиле Стафнова, која денеска сведочи во Кривичниот суд за случајот „Рекет“ во кој се обвинети Бојан Јовановски и екс шефицата на СЈО Јанева, за изнуда на пари од бизнисменот Орце Камчев.
По одложувањето на двете рочишта поади болест на адвокатите на Јанева, денеска во судницата се појави една од бранителите Ирена Фрчкоска, со што се исполни законската можност Стефанова да даде исказ. Таа го водеше предметот „Империја“ во која обвинети беа Орце Камчев, Цветан Панделевски, Ненад Јосифовиќ, Сашо Мојалков…
Таа рече дека на еден состанок Јанева и рекла за петмината притворени да им се изменат мерките и да се ослободат од мерката притвор.
„Наредбата за истрага првично беше против 13 лица, а за пет од нив сметавме дека може да влијаат врз сведоци. Јордан Камчев имаше двојно државјанство, имот надвор од земјава и силно влијание врз сведоците, а Панделески имаше привремена лична карта од Грција. Затоа за пет лица побаравме и беше определена мерка притвор. На некој чуден начин од истражителите бев известена дека Камчев спремен ги чекал да дојдат во шест часот наутро. Таму беше Зоран Милевски Кичееец, а подготвена чекаше и неговата сопруга Ана Камчева“, рече Стефанова.
Таа тврди дека при претрес во компанијата „Орка Холдинг“ бил присутен брачниот пар екс министерот за правда Михајло Маневски и неговата сопруга, поранешната судијка Филемена Маневска кои во времето на режимот на Груевски гасеа и палеа во правосудниот систем.
„Во канцелариите беше чистено. Тоа што го најдовме како докази го земавме“, вели Стефанова.
И судијката Кацарска, наводно, ургирала за Камчев
Според неа Панделески и Камчев цело време праќале емисари, политичари, судии и бизнисмени за да влијаат врз истрагата кај неа и кај Јанева. Стефанова сведочи и дека меѓу емисарите што се јавувале за ургенции за Орце Камчев била и судијката Добрила Кацарска, но не лично, туку преку друг обвинител. Кацарска била присутна и цел ден кога се одлучувало за притворот на Камчев, иако не била судија на претходна постапка.
Според Стефанова Јанева во декември започнала да бара повеќе информации.
„Околу 20 ноември прв го повикав Камчев да го запознаам со предметот. Тој од џебот извади лист и ми го даде. Ми рече читајте го делот каде е напишан на латиница од Наташа Савова. Пишуваше да разговарам со Сашо Мијалков за негово ослободување. На листот пишуваше дека за него ќе се преземат пакет мерки за кој ќе се погрижи Наташа Савова. Листот и го дадов на Јанева, но таа ништо не реагираше“, рече Стефановска.
Јанева, според Стефанова, наредила на петмината притворени да им се изменат мерките и да се ослободат од мерката притвор.
„Јас се побунив, но таа рече дрско „тоа е моја одлука, тоа е важно за процесите во државата и да се донесе законот за обвинителство”. Тогаш се побуни само еден колега, другите молчеа. Таа уште еднаш ме потсети да ги уважам жалбите на обвинетите“, рече Стефанова.