Игор Стефановски-Иџе е презадоволен од својот настап на Нирнбургринг каде се возеше третата од шесте трки во сезоната во ЕТЦЦ шампионатот. По четвртото и петтото место во Монца и четвртото и осмото место на Хунгароринг во Унгарија, најдобриот македонски автомобилист, конечно, на подиумот на познатиот автодром во Германија. И тоа не еднаш туку двапати. Втор во првата трка и победник во втората за комплетирање на викендот за паметење.
„Ова беше една од најдобрите трки во мојата кариера, слободно може да кажам и најдобра трка во мојот живот. Патеката на Нирнбургринг е тешка како да искачувате планина, па оттука и стекнатото искуство е непроценливо за мене и мојот тим кој направи одлични подготовки на автомобилот. Честитки до сите, завршивме одлична работа викендот“, изјави Игор Стефановски-Иџе по одличните настапи во Германија.
Стефановски победи во втората трка со време 28:11 минути пред Фабио Мота од Португалија (28:12,487) и Петр Фулин од Чешка (28:12,703).
Триумф во првата трка оствари Фулин со резултат 27:56,335 минути, Стефановски беше втор (28:04,981), а Мота трет (28:05,244).
Одличните трки на Нирнбургринг значат и нови 18 бода (10 за победа, 8 за второ место) на контото на Стефановски кој по првата половина од сезоната е трет во генералниот пласман со 33 бода. Лидер е Швајцарецот Крисјоханес Шрајбер со 44 бода, Фулин е втор со 43.
Наредниот натпреварувачки викенд во серијата e во Вила Реал, гратче на северот на Португалија, каде од 23 до 25 јуни ќе се возат првите улични трки во ЕТЦЦ шампионатот.