Со паролите „Не го даваме градот, градот е наш!“ и „Го сакам ГТЦ!“, стотици луѓе се собраа попладнево во Градскиот трговски центар, на протестот против намерата тој да се претвори во барокна зграда.
Професори, студенти, уметници, невладини, но најмногу граѓани на Скопје од сите генерации. Тие ја потпишуваа петицијата за спас на Трговскиот центар, а потоа држејќи се за раце, формираа жив штит, симболично прегрнувајќи го главното обележје на модерно Скопје, за да го одбранат од барокот.
Меѓу демонстрантите ја пронајдовме Лидија Марковска, една од проектантите на ГТЦ, таа вели дека градбата на ГТЦ е таква што е невозможно да се подигаат столбови – тоа нема да го издржи конструкцијата, вели Марковска. Таа од стручен аспект објаснува зошто е невозможно ГТЦ да се претвори во сосема друга градба.
Инаку, Марковска е добитник на високата државна награда „11 Октомври“, токму за работата на ГТЦ, на протестот попладнево ја донесе и плакетата, вознемирена раскажуваше дека веста за барокниот ГТЦ, кај неа предизвикал шок и неверување.
Пред граѓаните говореа професорите Митко Ралев, Елизабета Аврамовска, Небојша Вилиќ, Мартин Гулевски, Никос Чаусидис и претседателката на ААМ, Даница Павловска. Тие говореа за своите спомени од ГТЦ, за нетранспарентниот начин на кој е направен конкурсот за промена на објектот. Покрај архитектонските и културните вредности на ГТЦ, сите го истакнаа идентитеското значење на овој објект за Скопје и уште повеќе за сите негови граѓани.
На протестот со граѓаните дојде и Андреј Жерновски, градоначалникот на Центар, кој во живиот штит околу Трговски си ја најде и сопругата.
До вечерва на петицијата против барокен ГТЦ се потпишале повеќе од 4 илјади граѓани. Претседателката на ААМ, Павловска најави дека со потпишување на петицијата ќе се продолжи идниот петок.