Владата на Никола Груевски за 10 години потрошила 225 милиони евра за 25 компании странски инвеститори кои вработиле вкупно 20.000 луѓе.
Врз основа на податоците содржани во „Анализата на трошоци – наспроти резултатите од странските директни инвестиции во Македонија во периодот 2007 – мај 2017“, портпаролот Миле Бошњаковски рече дека, еден вработен кај странските инвеститори ја чинел државата по 11.000 евра, за кои државата се откажала од 69 милиони евра за ослободување од данок и царини.
„Ова било политика за економско шоу, а не за економски раст“, рече Бошњаковски.
Повеќето од вработувањата, информираше Бошњаковски, не се нови вработувања, туку работници преземени од македонското стопанство.
„Ова е сумираниот резултат од декласификацијата на договорите склучени во затворен круг, кои биле затворени за јавноста. Договори со кои се игнорирало македонското стопанство. Сакаме да појасниме дека не постоел документ или водич со јасни критериуми за преговарање, или барем ние не го најдовме. Критериуми не постоеле. Преговарале министри, советници, промотори, без никакви критериуми“, рече портпаролот на Владата.
Претходната Влада потрошила 26 милиони евра во кеш на неповратни грантови на странските директни инвестиции: 14 милиони евра за креирање работни места, 5 милиони евра за обуки, 10 милиони за градежни работи.
Странските инвеститори биле ослободени и од плаќање на вкупно 69 милиони евра преку ослободување од даночни и царински давачки. Бошњаковски посочи дека според владината анализа, само 1% од набавките на странските компании доаѓале од македонски добавувачи.
Уште 130 милиони евра од Буџетот се потрошени на привлекување странски инвестиции, за што портпаролот на Владата најави посебна пресконференција.
Претходната Влада, веднаш по завршување на преговорите, ги класифицирала договорените работи и на тој начин ја обезбедувала тајноста на податоците.
Бошњаковски потенцираше дека Владата целосно ќе ги испочитува сите договори и должности кон овие 25 странски инвеститори кои ќе продолжат да ги користат сите досегашни бенифиции, додека најави дополнителни податоци за нови мерки во следниот период.