Неформланиот референдум кој денеска го организира Студентскиот пленум во рамките на факултетите на Универзитетот „Св.Кирил и Методиј“ се одвива во мирна атмосфера, без инциденти и со заинтересираност на самите студенти кои треба да се изјаснат за статусот на нивниот претставник – Студентскиот Парламент.
Прашањето на кое студентите при УКИМ денеска одговараат со ДА и НЕ, гласи „Студенту, дали Студентскиот парламент треба да остане невладина организација како што е во моментот“.
Според досегашните проценки над 1.000 студенти излегле низ факултетите излегле да го дадат својот глас.
Првичните неофицијални резултати се очекуваат вечерва.
„Целта на денешниот неформален студентски референдум е да се покаже притисок врз самиот СПУКМ, дека самите студенти сакаат да кажат стоп на Студентскиот парламент и неговата неконтролираност во однос на трошењето на неговите пари и неговата нефункционалност. Сакаме и да покажеме дека СПУКМ треба да стане дел од самиот Универзитет. Гледаме дека е проблем тоа што Студентскиот парламент е невладина организација и немаме никаква контрола врз истиот. И покрај сите настани што се случија изминатите месеци, како што се изборите кои беа нелегитимни, тепачките и финансискиот извештај кој го обелоденивме пред јавноста, никаква директна контрола не може да се има врз самиот СПУКМ“, велат од Пленумот.
За референдумот на секој факултет е формирана изборна комисија составена од студенти волонтери од по минимум два члена.
Комисијата управува со избирачкиот материјал (избирачки кутии, избирачки ливчиња, избирачки список), на начин на кој се грижи за остварување на тајноста и правилата на избирачкиот процес, во кој гласаат сите студенти кои со себе носат индекс или студентска легитимација.
Референдумот доаѓа после изборите за нов претседател на СПУКМ на најстариот државен универзитет „Св. Кирил и Методиј“, кои летоска се одржаа во насилна атмосфера.
Единицата за брзо распоредување, го штитеше раководството на СПУКМ кое реши да ги спроведе изборите за студентски лидер по секоја цена.
Изборните кутии од избирачките места пред камерите на медиумите беа изнесувани од избирачките места, иако според Статутот, гласачките кутии се отвораат на факултетите и гласовите треба да бидат пребројувани јавно.