Невладината организација „Евротинк“ денеска на брифинг со новинарите ги презентираше приоритетните цели, мерки и активности во областа на „Контрола врз полицијата и агенциите за безбедност и (контра)разузнавање“ кои се опфатени со „Предлогот на граѓанските организации за итни демократски реформи – Блупринт“.
Во поглавјето се опфатени 11 приоритети, која институција е надлежна за спроведување и за колку време треба да се спроведе конкретната мерка, на пример за 3, 6 или 9 месеци.
Во овој дел, предвидено да се воспостави надворешен механизам за контрола врз полицијата и да се подобри внатрешната контрола. Исто така, предвидено е да се зголеми финансиската контрола на Министерството за внатрешни работи, да се подобри интегритетот на полицијата. Да се зајакне парламентарната контрола на Агенциите за разузнавање и контраразузнавање.
Предвидено е и да се зајакне контролата на телекомуникациските оператори во делот на следење на комуникациите, односно да се овозможи собраниските комисии да вршат надзор над телекомуникациските оператори; да се воведат построги казни за вработените во операторите кои неовластено ќе пристапат или ќе овозможат пристап до мета-податоците или до содржината на комуникациите. Во овие мерки предвидено е и да се подобри транспарентноста на државните институции и операторите. Да се воведе законска обврска за судовите на годишно ниво да објавуваат колку барања добиле од државните орган за следење на комуникациите- односно, за колку лица се побарани, на која основа и колку такви барања биле прифатени, а колку одбиени. Истава оваа обврска е предвидена и за операторите (на годишно ниво) да објавуваат податоци за бројот на добиените налози и за бројот на следени телефонски линии.
„Ова поглавје на документот произлезе како производ на активниот придонес на шест невладини организации и еден експерт на темата кои земаа свое учество на Форумот на граѓанските организации кој се одржа на 4 и 5 јули оваа година. Истовремено, тој претставува израз на долгогодишното искуство и експертиза на контрибуторите кон изработката на овој документ во областа на Контрола врз полицијата и агенциите за безбедност и (контра)разузнавање“, велат од „Евротинк“.