Нејасно е како Судот го одолговлекува предметот „Пуч“ повеќе од една година, како што обвинуваат странките од предметот, кога за конкретниот предмет одржани се 10 главни расправи, реагира со соопштение до јавноста, Кривичниот суд.
Оттаму велат, со цел да не дојде до одредени манипулации, ja потсетуваат јавноста дека по конкретниот предмет одржани биле 10 главни расправи од кои 6 се одложени бидејќи обвинетите постојано биле на службени патувања, потоа 3 расправи по барање СЈО, од кои едната била поради приватна прослава на обвинителката Јанева, и една поради поротник од Судот.
Кривичниот суд соопштува дека главната расправа по предметот „Пуч“, денеска е одложена откако претседателот на судечкиот совет, надлежен да постапува по овој предмет, пред присутните констатирал дека еден од судиите – поротници, по неговото лично барање бил разрешен од советот, а со одлука на претседателот на судот, по барање на претседателот на советот, назначен е нов судија – поротник, како и дополнителен судија – поротник, за кои и покрај барањатa и ургнециите за итност, испратени од претседателот на судот, сеуште не се доставени безбедносни сертификати за постапување и увид во класифицирани информации.
– За сето тоа на денешната главна расправа, во присуство на јавноста беа известени странките во постапката, како и присутните претставници на медиумите, а главната расправа беше одложена на неопределно време, односно се додека неопходните сертификати не бидат доставени до судот, се вели во соопштението на Судот.