Народниот правобранител Иџет Мемети на 3 октомври испратил барање до Претседателот на Собранието за избор на заменици на оваа функција.
Во официјалното писмо на Мемети пратено до Трајко Вељановски се предлагаат како заменици на Народниот правобранител да бидат Сузана Салиу и Јован Андоновски.
Салиу веќе била заменик на народниот правобранител на Република Македонија од 1997-2006 година а во 2011 година била избрана за пратеник од редовите на Демократската унија за интеграција. Во моментов Салиу раководи со Центарот за управување со кризи. По поплавата од 6 август оваа година Салиу повеќе денови не излезе со реакција по оваа елементарна непогода.
Јован Андоновски е државен советник и државен секретар во Секретаријатот за европски прашања.
„По извршените интервјуа – разговори со кандидатите и дополнителните консултации, Народниот правобранител одлучи да му предложи на Собранието на Република Македонија да ги избере предложените кандидати за кои верува дека успешно ќе ја извршуваат функцијата заменици на народниот правобранител. При изборот и утврдување на кандидатите, освен уставните и законските одредби, предвид се имаа стручните искуства и познавањето на делокругот на работа од надлежност на народниот правобранител што ќе треба да ја извршува предложениот кандидат и обезбедување соодветна и правична застапеност на кандидатите кои припаѓаат на сите заедници во Република Македонија, согласно со член 6, став 2 и 3 од Законот за Народниот правобранител“, се вели во образложението на народниот правобранител.
Тие треба да бидат избрани на 12 октомври.