Во рамките на 52-то издание на Струшките вечери на поезијата, на меѓународниот поетски собир „Мостови“, вечерва ќе бидат врачени наградите „Златен венец“, „Браќа Миладиновци“ како и „Мостови на Струга“.
Мексиканскиот поет и критичар Хосе Емилио Пачеко е 48-миот добитник на највиското признание на фестивалот, добитник на филигрански лавров венец.
„Помнам“ на Ристо Јачев е најдобра книга меѓу две изданија на фестивалот Струшки вечери на поезијата за 2013 година.
Признанието „Мостови на Струга“ што УНЕСКО и Струшките вечери на поезијата го доделуваат за најдобар поет-дебитант ќе и биде врачено на македонската поетеса Николина Андова за дебитантска книга „Влезот е од другата страна“.
Покрај добитниците на наградите, на поетскиот митинг ќе настапат и поети од разни страни на светот.
Педесет и вториот поетски фестивал свечено беше отворен во четвртокот со традиционално читање на Константиновата „Т’га за југ“ и палење на фестивалскиот оган, а по поетското читање „Мостови“, следните два дена учесниците ќе го посетат Скопје и други градови низ Македонија.