Пожарот во Модуларната болница во Тетово е катастрофален инцидент и го изразуваме нашето најдлабоко сочувство до семејствата и до најблиските на жртвите и до преживеаните. Владата на Северна Македонија ги истражува причините за оваа трагедија и ние тоа внимателно го следиме, изјави денеска за НоваТВ, портпаролот на Канцеларијата на Светска банка во Република Северна Македонија.
Министерот за здравство, Венко Филипче, на вчерашната прес-конференција во Владата, изјави дека „поставувањето на сите модуларни ковид-центри се по строгите критериуми и претходна согласност од Светска банка“.
– Што се однесува до самите болници и нивниот квалитет ќе кажам кратко дека нашиот внатрешен увид покажа дека сите вградени материјали во објектите има сертификат за материјалите и а-тест на електрична, водоводна и канализациона инсталација. За појаснување, сѐ што е вградено од материјалите е со сертификат од производителот, а процесот на инсталација е со а-тестирање. Сето тоа е под надзор на акредитирана компанија што контролира дали се обезбедени сите сертификати за буквално секој материјал што се вградува во модуларната болница. По завршување на сите постапки, сите надзори и техничкиот прием, модуларниот центар се примопредава на болницата во градот, на понатамошно управување и одржување на објектот. Поставувањето на сите модуларни ковид-центри се по строгите критериуми и претходна согласност од Светска банка, изјави вчера Филипче.
Во Канцеларијата на Светската банка во РС Македонија денеска ги прашавме колку модуларни болници вкупно има во светот, а се поддржани од Светската банка и дали во некоја се случила ваква трагедија како во тетовската болница прексиноќа. Како и – што пишува во извештајот на Светска банка за модуларната болница во Тетово – има ли забелешки во врска со нејзиното предавање во употреба…