На јубилејните „Рацинови средби“ во Велес, кои завршија вчера, на средбата на лауреатите на Рациновото признание, минатогопдишниот добитник – писателот Христо Петрески предложи да се востанови Светска награда за поезија која ќе го носи името на Кочо Рацин.
Неговиот предлог наиде на одобрување кај останатите учесници на симпозиумот, но и кај присутните.
Предлагачот, заедно со останатите колеги – писатели, оваа иницијатива ја упати до Советот на „Рациновите средби“, со надеж и верба дека веќе од наредната година ќе започне да се доделува во Велес и Светската награда за поезија “Кочо Рацин“.
„Половина век од одржувањето на манифестацијата “Рацинови средби“ во Велес – е убав повод и можност и за исправање на еден мал парадокс и неправда, односно за иницирање и покренување на уште една нова благородна идеја. Имено, со години по ред се доделува “Рациновото признание“ за прозно дело (роман или збирка раскази), иако сите добро знаеме дека Кочо Радин бил превосходно поет и родоначалник на современата поезија.
Па, токму затоа, нека продолжи и во иднина да се доделува “Рациновото признание“ за проза, зашто Рацин имал реализирано творечки обиди и на тој план, но час поскоро, поточно веќе од наредната година – предлагам да започне да се доделува Светска награда за поезија со името на Кочо Рацин. Дури и името на наградата би можело да биде Светска награда за поезија “Кочо Рацин“. Тоа Рацин го заслужува, а на тој начин уште повеќе ќе се слушне за неговиот лик и поетско дело ширум светот“, вели Христо Петрески