Со презентацијата на резултатите од проектот „И јас можам да бидам балерина“ денеска во Кинотека на Македонија во Скопје ќе биде одбележан 21 Март, Светскиот ден на Дауновиот синдром. Организаторите информираат дека во рамки на одбележувањето ќе има и балетски перформанс.
– Изминатите неколку години организиравме голем број активности, и ја користевме секоја можност за подигнување на свеста за тоа дека има многу луѓе со Даунов синдром во нашето општество, што се соочуваат со секојдневни предизвици. Тие заслужуваат да живеат живот без дискриминација врз основа на попреченоста, велат тие.
Додаваат и дека годинава глобалната кампања се фокусира на: #WhatIBringToMyCommunity со надеж дека овие настани ќе можат да објаснат како луѓето со Даунов синдром можат, и даваат значајни придонеси во текот на нивниот живот, без разлика дали во училиште, на работа, во општеството, јавниот и политичкиот живот, културата или спортот.
По поводо овогодишното одбележување на овој ден, снимено е видео на мајки кои со своите дечиња со Даунов синдром ја пејат „A Thousand Years“.
Инспирацијата за стилот на снимката доаѓа од популарниот сегмент „Carpool Karaoke“ од шоуто на Џејмс Корден во кој гостите пеат во автомобил.
Проектот „И јас можам да бидам балерина“ е имплементиран со помош на Европската Унија и UNICEF преку регионалниот проект финансиран од страна на Европската Унија, и кофинансиран од UNICEF „Заштита на децата од насилство и унапредување на социјалната инклузија на децата со попреченост во Западен Балкан и Турција“.
В недела во 11 часот во Градски парк во Скопје ќе се одржи третата по ред хуманитарната трка за децата со Даунов синдром.
Трката која ќе го носи името „И ние го можеме истото како и сите!“ е во организација на Мечувалечки клуб Ескрим и ќе започне во Градскиот парк во Скопје.
„Трката е отворена за сите наши хумани граѓани, но ќе учествуваат и децата со Даунов синдром и нивните семејства. Со овој настан сакаме да ја подигнеме свеста за овие прекрасни личности, да ги поттикнеме и останатите спортски клубови да ги отворат вратите за децата со Даунов синдром, да ги вклучиме во спортот и да им обезбедиме еднаков пристап до него како и за редовните деца“, се вели во описот за хуманитарниот настан.