На територијата на Скопје има 180 бездомни лица,а на дневна основа услугите на Пунктот за бездомни лица во Момин Поток ги користат 50 лица, соопшти денеска секретарот на Црвен крст – Град Скопје, Сузана Тунева Коневска, повикувајќи се на базата на податоци на Црвениот крст.
Пунктот за бездомници на територијата на Скопје функционира веќе осум години.
Во Пунктот два пати во неделата бездомниците можат целосно да се грижат за својата хигиена, да добијат облека, топла храна, совет од лекар, психосоцијална поддршка и правна помош.
Пунктот има посебна програма во зимскиот период, подготовките за зимскиот период се завршени и има дополнителни 20 кревети во однос на минатата година. Вкупно има 40 легла, а ако има поголем број лица, кои бараат сместувања се отвораат и дополнителните интернати или се наоѓаат алтернативни решенија.
Тунева Коневска рече дека е зголемен и бројот на социјални патролни служби, а има дополнување и на медицинскиот услуги.
Во врска со ресоцијализација, тимот работи на враќање на овие лица во нормалните текови на живеење.
– Тоа се лица кои ја имаат загубено довербата во системот, во луѓето, во самите себе, така што индивидуалниот пристап кон личните проблеми на овие луѓе е давање поддршка повторно да се пронајдат себе си и да можат да го најдат своето место во општеството, рече Тунева Коневска.
Десет лица во изминатите осум години, колку што работи Пунктот се вработени и веќе се грижат самите за себе.
Во рамки на пунктот има фризерски салон, во кој овие лица можат да ги користат услугите и таму работи лице, кое претходно било бездомник.
Неодамна, НОВА ТВ објави сторија за бездомникот Муарем Демиров, кој со гангренозни нозе со месеци беше сместен во Психијатриската болница во Бардовци, со неосновани обвинувања дека има психијатриска дијагноза. Но по притисокот на НОВА и Хелсиншкиот комитет, тој конечно беше опериран и сега е сместен во Геронтолошкиот завод.