Светските лидери се собраа денеска во Европскиот парламент во Стразбур да го испрат за последен пат архитектот на светскиот поредок Хелмут Кол.
Ова е прва комеморација од ваков тип одржана за еден европски политичар.
Покриен со знаме на ЕУ, ковчегот на бившиот германски канцелар беше поставен во центарот на Европскиот парламент додека над 800 присутни меѓу кои Бил Клинтон, Дмитриј Медведев и Ангела Меркел му оддадоа почит.
-Хелмут Кол ни пружи шанса да бидеме дел од нешто поголемо од нас самите, изјави Клинтон сеќавајќи се на честите средби во текот на неговиот мандат.
-Сакаше да направи свет во кој никој не е доминантен во однос на другиот. Успеа во тоа и ние кои тоа го доживеавме те сакаме заради тоа, истакна Клинтон.
Кол, кој беше канцелар од 1982 до 1998 година беше сведок на крајот на Студената војна и го сметаат за главен ум на обединувањето на Германија.
Рускиот премиер Дмитриј медведев го опиша Кол како архитект на светскиот поредок.
-Ќе го паметиме како наш пријател – мудар и искрен човек, рече тој.
Претседателот на Европската комисија Жан Клод Јункер рече дека со смртта на Кол заминал еден џин на повоената ера.
-Хелмут Кол беше германски и европски патриот, изјави Јункер.
Меркел која за време на Кол во 90 години беше министерка вели дека често со пријатеките се потсетуваат на понекогаш контроверзната фигура.
-Би можела да ви раскажувам приказни… Но сите тие се во сенка на неговите животни достигнувања, изјави Меркел.
Антони Таљани претседател на ЕП рече дека Кол заслужува почесно место во европскиот пантеон.
На двочасовната комеморација присуствуваа и Тереза Меј, Емануел Макрон и Петро Порошенко.
Церемoнија заврши со интонирање на германската химна и на 9 симфонија на Бетовен “Ода на радоста“ која е химна на ЕУ.
Кол почина на 16 јуни, а ќе биде погребан во германскиот град Шпаер, каде што се наоѓа катедралата во која почиваат бројните владари на Римското царство.






